Gedagtes van Liefde …

Wat is my eerste gedagte van liefde, dit wat was tussen en my Deon, my droomman, my trou man, die man wat ek so lief gehad het dat dit my seer gemaak het! Ek het nooit weer so oor iemand gevoel nie. Hy het my hart “custard” laat klop, my bene soos “jellie” laat bewe. Ek sal seker Sondag vir sy ma gaan vra vir foto’s van hom, dan sal ek dit scan en vir julle kom wys, watse mooie man hy was, blond, groen blou oè, mooiste stem aan hom gehad, soms as ek so alleen sit, verlang ek so na hom, dan hoor ek sy stem. Dit wat tussen ons was, is my enigste gedagte aan ware opregte liefde!

Is jy lief vir die lewe? Moet dan nie

tyd vermors nie; want tyd is waaruit

die lewe bestaan …. Verlore tyd

word nooit weer ingehaal nie.

~Benjamin Franklin~

Ek was nog op laerskool toe ek hierdie blonde seun die eerste keer sien, my hart het byna uit sy kas uitgespring, toe my pa die oom groet, vra ek dadelik, ken pa die oom dan? My pa het my so gekyk en gelag, genade kind die mense bly so paar huise van ons af, in dieselfde straat. My pa MOES my toe wys waar die mense bly, toe ek die tannie sien en haar groet, vertel my pa my, maar dit is die vriendelike tannie se seun. Ek en die tannie het mekaar gereeld gegroet en altyd gestaan en gesels. Tot vandag toe skryf ons gereeld vir mekaar briewe, ek stuur nog elke jaar vir hulle ‘n kaartjie vir kersfees. Ek gaan kuier nog gereeld vir die oom en tannie, ek is genuine baie lief vir hierdie twee mense, ek het altyd gesè dit is my ander ma en pa.

Soos ek ouer geword het, het ek al hoe meer van Deon gehou, hoe al hoe meer gesien, ons het begin hou van mekaar, gaan fliek, en dieselfde wat ek vir hom gevoel het, het hy vir my gevoel, hy het eenkeer vir my gesè ek is sy alles, hy is liewer as lief vir my. Wat het dan verkeerd gegaan?

Ek was in St 9 toe is hy army toe, Phalaborwa toe, briewe vir mekaar geskryf, foto’s gestuur vir mekaar, hy het soms gebel, as hy kom kuier het, het ons gaan fliek. Maar ……… hy het iemand ontmoet, en die lady het gesorg dat sy swanger word met sy kind. Hulle moes toe trou. Ek was teen die grond, stukkend. Ek ontmoet toe my eks ……..

Deon en sy was nie lank getroud nie, toe is hulle geskei omdat sy ‘n verhouding met ‘n ander man gehad het. Dit het Deon gebreek, maar in die tyd wat hy geskei is, is ek met A getroud, en swanger met Jaco.

Om die hele elle lange storie kort te maak: my ma bel my een oggend om te vertel Deon is dood, ek het die foon neergesit, en net gestap, ek het Beestekraal plat geloop, hoe verder ek loop hoe meer het ek gehuil! Deon is so end van my (eks) skoonpa af begrawe. As ons gaan blomme op die grafte sit, is dit eers my ouma se graf, dan my pa se broer wat in ‘n  kar ongeluk gesterf het, twee rye verder is dit my eks se pa (vir wie ek baie baie lief was), dan een ry verder is dit Deon. My blondekop is met my hart is in sy hande hemel toe.

Nadat ek en A geskei is, was die oom se woorde, noudat jy geskei is, is my Deon ‘n ENGEL. Hulle het bly hoop en glo dat ek en Deon tog eendag sal trou.

Hier waar ek nou sit, is hy my enigste gedagte aan ware liefde, want my eks ek was so klein bietjie lief vir hom, maar elke keer as hy of die kinders so geslaan het, (hy was en is ‘n vrouslaner), het ek hom meer en meer gehaat! My gedagtes aan liefde met Koos, daar is NIKS nie, net mooi niks nie! Koos het die vrou in my versmoor, dit bestaan nie meer nie, Koos het my selfbeeld vernietig, Koos het my al so sleg gesè dat geen water my ooit weer skoon sal kry nie. Niks wat ek doen of sè is in hierdie man se oge reg nie … ek weet hy sien tans iemand anders, al die bewyse is daar, hy het dan ‘n strokie waar hulle gaan uiteet het in die kombuis laat lè. Hy het op sy American Swiss rekening ‘n ring vir haar gaan koop. Toe ek die rekening Saterdag gaan betaal het, vra ek die dame is daar nog enige uitstaande gelde, sy sè toe ja die ring wat julle laasmaand gekoop het, moet nog betaal word! Ek het so gebewe ek het nie eers gevra hoeveel uitstaande is nie! As ek gedagtes kry oor Liefde, dink ek altyd net aan Deon!